Sekolah Naek Taksi

Di kota Pelembang angkot tuh disebut dengan 'Taksi'. Di sini taksinyo 'full music'. Bedentam dentum bunyinyo, pacak pecah palak nenger musiknyo. Ini namonyo taksi bekecepatan suaro : taksinyo belum kejingokan, suaronyo dem kemano-mano. Bukan apo-apo, kalu taksinyo dak katek musiknyo, mano galak budak-budak naekinyo. Dak lemak, sepi, dak ragap, kato budak-budak tuh.

Kalu naek taksi nih, kito pacak ngerasoke jalannyo mundur. Itu kalu kebagian 'bangku tembak' yang ngadep ke belakang. Pernah kawan lanang nih kebagian 'bangku tembak' yang ngadep ke belakang tuh. Duduk beradepan di depannyo tuh budak betino galo. Ado budak SMA 10 dewek, ado jugo budak SMA 1 dan SMEA 2. Sampe di halaman SMA 10 barulah ketaonan kalu retsleting celanonyo tebukak kareno jebol. Ooiiii coi ... alangke bagusnyo ... mengkali dem jadi tontonan budak-budak betino tadi lah ye isi retsleting celanonyo yang jebol itu tuh ....

Nah, kalu pegi ke sekolah, banyak budak-budak sekolah yang naek taksi. Kalu budak SMA 10 naek taksi jurusan Bukit Besak Taman - Pasar Proyek. Warnonyo biru. Saingan budak SMA 10 nih budak-budak SMA 1 dan SMEA 2. Aaaiiiiii di sinilah sedepnyo pengalaman saro budak SMA 10 naek taksi ke sekolah (Maaf ye .. ini dak pulok teraso bagi budak-budak yang naek kendaraan pribadi he he ..).

Budak-budak yang balek ke seputar Kodim sampe jurusan Tanggo Buntung, nunggu taksinyo kadang di parak Kodim, kalu dak galak naek dari Pasar Proyek. Naek dari Pasar Proyek pun saro jugo coiii ... Kalu maseh di bawah jam setengah lapan, angkot dari Pasar Proyek tuh cuma galak ngawak budak sekolah sampe lampu merah simpang Bukit - Kapt Rivai bae. Jadi budak-budak SMA 2 yang melenggang dikin ..... Kalu budak-budak SMA 2 sudah abes, taksi nih cuma galak ngawak budak sekolah sampe SMEA 2 bae. Jadi budak-budak SMA 1 dan SMEA 2 yang berikutnyo melenggang ... Budak-budak SMA 10 ? Kagek dulu coi .... sabar ... Naseb, naseb .... Nah, men budak SMA 1 dan SMEA 2 sudah abes, barulah taksi tuh galak ngawak budak sekolah sampe ke Taman (SMA 10).

Kadang-kadang taksi nih dak pulok sampe ke Pasar Proyek. Taksinyo cuma dari SMEA 2 sampe simpang Kodim. Bolak-balek nanggoki budak-budak sekolah yang nunggu di parak Kodim. Pernah waktu nunggu di parak Kodim, datanglah taksi kosong warno biru dari arah Bukit, langsung belok di simpang Kodim. Kito sudah siap-siap ngicingi ke mano kiro-kiro posisi taksi nih berenti, supayo lawang taksi tuh tepat berenti di depan kito. Mak itu taksi tuh belok ... saaaaappp ....kito icingi ngembek posisi .... supayo pas lawang taksi tuh berenti depan raih kito. Pas pulok berentinyo. Kito buka lawangnyo, masuk duluan, masuk pertamo, langsung duduk. Agak lego ati rasonyo. Budak laen berebut jugo nak naek. Mak itu kito baru teduduk lemak, sopir taksinyo berteriak : 'SMEA ... SMEAAA ...'. Oooiiii dah ... kurang ajar ... %%*&Y)$@(U(??><*& ... tepakso kito keluar lagi. Tepakso nunggu taksi laen lagi yang nak ke Taman.

Mak itu lah. Sampe berebut nak dulu-dulu-an naek taksi tuh. Kadang-kadang saking rebutannyo, ado yang besengkut melumpat masuk dari jendelo ke jero taksi tuh supayo pacak masok duluan. Kalu gara-gara taksi, sampe telat datang ke sekolah, pacak nian coii keno tabok oleh P Rskn. Yo ... paleng idak singitan atau belari dibebes beliau tuh.

Mak mano kalu balek sekolah ?? Samo bae, Mang, naseb budak SMA 10 tuh. Taksi jurusan Taman - Pasar Proyek tuh berubah dulu jadi jurusan SMEA 2 - Lampu Merah. Dem tuh jadi jurusan SMEA 2 - Kodim. Dem tuh jadi jurusan SMEA 2 - Pasar Proyek. Dem tuh barulah jadi jurusan Taman - Lampu Merah, Taman - Kodim, dan Taman - Pasar Proyek. Kadang jadi sungkan nak berebutan naek taksi balek sekolah nih. Nyungkuk dulu lah di depan sekolah sambil ngobrol. Men sudem sepi baru lah balek naek taksi tuh.

Pernah jugo kareno kecik ati, budak nih nyimbati kenek taksi yang beteriak 'merah .. meraahh ..'
Kato budak nih, 'Ado apo di lampu merah .. ?'.
Disimbati lagi oleh kenek taksi tuh, 'Cumak kau ...!!'
Aiii jangan ooiii, gek pacak begoco pulok.

Pernah pulok ado budak nih balek sekolah ke rumahnyo di parak Jeramba Karang. Dak nanyo-nanyo, sopirnyo dak ngomong pulok, naek bae dio. Ruponyo taksinyo berenti cuma sampe Kodim. 'Kodim, kodim' kato sopirnyo. Oiii Wak ... mano ongkos cuman tinggal itulah. Tepaksolah bejalan kaki balek ke rumah. Nyiksooo .... ini namonyo. Kurang ajar sopir taksi tuh.

Mak itulah rengkonyo budak SMA 10. Naek taksi nak pegi sekolah saro, balek sekolahnyo jugo saro. Tapi lumayan lah nunggu taksi rame-rame nih. Pacak sambil cuci mato nyingoki budak-budak SMA laen yang belagak-belagak. Atau ketemu kawan lamo dari sekolah laen. Kadang jugo ketemu dengan budak yang naksir kito dulu.

Itulah makonyo, pegi sekolahnyo pagi-pagi nian, waktu maseh sepi, sebelum banyak saengan budak sekolah laen. Kalu nyampe sekolah tuh kepagian, lejar lah sano, tecugem di sekolah dewek-an. He he he .....


(Kontribusi dari M. Irsan, alumni 3A1 angkatan 1987, saat ini bermukim di Medan, Indonesia)

Cinto Kelapo

Dak tebalek apo sudah dunio ni? dimano-mano pepata tu bebunyi, "Bagai pungguk merindukan rembulan". Nah mak ini ari, memang dak jamannyo lagi mengkali ye. Budak jaman sekarang ni lah laen cerito, katek lagi istilah nunggu keno tembak, kalu pacak nembak dulu.... (bukan pake pistol nembaknyo tuh). Maksudnyo kalu nak nyatoke cinto tuh dak nunggu pihak lanang dulu yang nyatoke, tapi budak betino jugo kalu nakser biso ngomong duluan ke wong yang ditaksirnyo.

Kalu jaman mak ini ari ni tejadi waktu aku sekolah dulu, oi pacak banyak nian yang aku tembak´i...he..he..he.., pake pistol banyu nembaknyo.......basah galo jadinyo.

Aku jugo dak ngerti ngapo nian jaman SMA tu budak-budak banyak nian yang kejer-kejeran, nak maen orik´an apo?. Apo aku ni memang kuper, telmi dan terlalu cuek mengkali ye. Padahal banyak jugo yang nak maen kejer-kejeran samo aku. Tapi aku dak ngerti aturan maen orik´an tu, yang aku tau cuma maen cek engkleng. Makonyo jadi dak nyambong, wong nak ngajak maen kejer-kejeran malah aku ajak maen cek engkleng.

Balek lagi ke cerito si rembulan tadi, jadi dio tuh pengen nian si ponggok tahu apao yang ado di atinyo. Sayangnyo dunio memang belom tebalek jaman itu. Jadilah pepatah tu berubah, "pecak rembulan merindukan pungguk". Pokoknyo cak mano nian caronyo supayo pacak bekenalan dengan si ponggok. Sekali.....duo kali.....cari akal, tapi gagal galo. Nak ngomong apolagi, tetep bae pepatah jadi tebalek. Naseb-naseb si ponggok memang saro nak di deketi .
Mak mano nak deket, wong SMAnyo bae laen. Jadi critonyo tuh betepok sebelah tangan, atawa cinto kelapo....kito cinto wong dak apo-apo. alangke merananyo oi si rembulan tu, yo cak itulah jaman bingen dulu. Laen nian dengan jaman mak ini ari, dak pacak aku nak ngomong lagi. Dunio-dunio memang sudah canggih.


(Kontribusi dari Vera Agustina, alumni 3A2-2 angkatan 1987, saat ini bermukim di Erlangen, Republik Federal Jerman)

Rutin Gino Sekolah Tuh

Sekolah tuh banyak gino rutinnyo. Yo namonyo jugo sekolah. Sekolah tuh memang gawe rutin. Tiap ari bangun pagi. Pake baju seragam putih abu-abu. Pagi tulah pegi ngawak buku ke sekolah (kadang ngawak bukunyo cak iyo-iyo nian). Agak siang dikit ado lonceng keluar maen. Kalu dem siang balek ke rumah dewek-dewek (walaupun ado jugo yang nyimpang keluyuran).

Kalu keluar maen yang 15 menit itu, budak-budak banyak jugo ke kantin di bawah sano, yang galak diinepi guru PMP dulu. Yang di bawah batang kayu besak. Katonyo budak-budak ke situ, kalu majo pempek tigo ngakunyo duo. Majo empat ngaku duo. Payahnyo tuh kalu ngaku duo, lah ngutang pulo. Aiii mada’i pacak rubuh warung tuh. Mudahan dak betul itu. Kareno beduso itu.

Tiap ari budak-budak tuh nengerke guru ngomong di depan kelas. Sedepnyo kan kalu gurunyo galak bekelakar. Kalu gurunyo dak lemak atau serem, nah .. tahanke lah dewek mules perut tuh. Makonyo galak ado yang minggat. Mengkali lak malek dio kelamoan di kelas ari tu. Mendingan kalu dio balek ke rumah. Ini nyungkuk-nyungkuk di pinggir jalan. Ooiii, kalu balek pacak-pacak diocehi dio oleh Emak atau Abah nyo. Budak-budak minggat nih kalu ketaonan oleh P Rskn, pacak dibebesnyo. Kalu keno oleh dio pacak disungkemkennyo. Ini guru sangar. Te-ampun-ampun galo budak samo dio. Dio galak jugo nyemur budak sikok kelas di lapangan kalu kelas itu ribut. Ooiii pacak budak tuh jadi iwak balur galo.

Tapi kalu minggat nih ado bakat-bakatnyo (maksudnyo budak-budak yang bebakat galak minggat)

Selain gawe rutin belajar, rutin lainnyo adolah upacara bendera. Budak-budak seluruh kelas baris galo di bawah batang kayu di lapangan tuh, ngadep kantor guru. Kalu gurunyo lemak, beteduh galo parak ruangnyo. Tapi kaki nih kemeng kalu tegak tecugem terus, apolagi kalu pidatonyo lamo. Nak duduk di barisan tuh pacak keno marah. Celaka 12 lah itu. Budak-budak yang telat datang upacara tepakso singitan di sekitar sekolah. Kadang sambil ngopi pulok itu. Kalu tejingok P Rskn, pacak rengkoh badan. Paleng idak disuruhnyo nyapu, kalu dak keno benyukke. Makonyo kalu tejingok, budak tuh belarian galo singitan. Itu bae masih galak dibebesnyo.

Pernah si Smdn waktu kelas I, telat dan singitan di jabo pager samping sekolah. Rewang dio di situ ado sikok budak lanang dan tigo budak betino. Telat galo. Mak itu upacara dem selesai, si Smdn manjat pager duluan. Nak besengkut caknyo. Mak itu manjat, ngangkat kaki kanan, koyak pulok selangkangan celanonyo. Lebih lejar lagi, nyongol pulok sempak kendurnyo dari koyak an celanonyo itu di depan rai budak betino di belakang dio tuh. Oiii ........ ini dio celako 13 namonyo. Tepakso dio balek ke rumahnyo lagi, ngenti celano. Padahal pagernyo tuh ado lawangnyo. Dak tekunci pulok.

Memang sekolah tuh banyak jalur masuknyo. Di beberapo tempat, pagernyo dak belawang. Kadang lawangnyo dak tekunci.

Sikok lagi yang rutin nih, senam. Ampir tiap ari ado kelas yang keno giliran senam pagi. Pokonyo lagu senam tuh dem meraung-raung men pagi. Mang Cek Wan apo yang galak ngidupkenyo ? Tepaksolah datang ke sekolah agak besengkut dikit. Tapi senamnyo tuh tetep make baju putih biru. Yo .. mano pacak senamnyo nak serius.

Sikok lagi, tiap semesteran ado bagi rapot. Sebelum bagi rapot, ado ujian semesteran dulu. Inilah waktu yang meningke palak. Belajar terus coiii. Nak ngadepi semesteran tuh, perut nih mules tulah. Apolagi kalu Matematika, Fisika, Kimia. Tapi ado jugo budak yang cuek bae dio. Aii talake lah ujinyo. Bukannyo kareno lah pinter, tapi dak tahu lagi nak belajar mak mano. Dak ngerti pelajarannyo. Tapi kalu ujian dem selesai, lego nian rasonyo, tinggal nunggu bagi rapot, dem tuh baru libur seminggu. Nah, sambil nunggu bagi rapot nih, biasonyo ado kompetisi .. biasonyo .. olah raga (istilah wong tuh Class Meeting). Biasonyo ....

Ado jugo yang nak jadi juaro tulah. Cuman waktu kelas 5 SD katonyo dio dak jadi juaro kelas. Kalah dio dengan budak betino di kelasnyo di SD dulu katonyo. Aii siapo bae juaro, lajukelah ... Ado jugo yang malek dio dengan bagi rapot. Kalu bagi rapot, dak diembeknyo rapotnyo. Dak datang dio ke sekolah. Tapi apo nak dijingok di rapot tuh. Angkonyo mak itu – mak itu lah. Cuma kadang agak bewarno dikit bae. Keciklah kemungkinan dak naik kelas. Itu pun kalu memang lah buyan nian .........

Mak itu salah sikok lagi cerito jaman bingen SMAN 10 Palembang ....

(Kontribusi dari M. Irsan, alumni 3A1 angkatan 1987, saat ini bermukim di Medan, Indonesia)

Super Idak Jugo, Kalu Kuper Iyo ...

Cerito maso SMA di SMA 10 memang cak lagu "Nostalgia SMA", memang lemak nian untuk dikenang, seolah dunio tuh punyo kito nian. Waktu itu, kami bagian dari budak A1-1 (Fisik) taon angkatan 1990-91/92. Macemnyo umur kito waktu itu dak bakalan pernah jadi bertambah, kito bakalan tetap mudo, seolah-olah dunio milik kito nian...ha..ha..

Memang budak A1-1 identik dengan budak-budak yang kuper, dak galak dan dak pacak begaul, pacaknyo cumo belajar .. belajar .. dan belajar bae. Nyingoki buku tulah. Itulah mengkali bayangan dari budak angkatan 1990-91/92 khususnyo budak Bio dan budak Sos. Jadinyo, kami kejingokannyo dianggap sok Super, walaupun kenyataannyo kami sebenarnyo sedikit kuper...ha..ha... Kamipun susah untuk masuk dan begaul dengan kelas lain, wong A1 cumo ada sikok kelas, jadinyo kami sering main dan bergaul samo2 budak2 Fisik bae.

Kalu inget dulu, rasonyo memang lemak nian maso SMA, rutinitas di sekolah agak sedikit monoton, pagi masuk kelas, belajar banyak macam mato pelajaran, istirahat pertamo langsung kantin bawah tuh digari. Dan kadang jugo ke warung pempek di sembrang SMA 10. Disitu lah banyak ngumpul budak-budak lain dari lain kelas, di waktu itulah pacak dikit ngelupoke pelajaran sekolah dan pacak dikit-dikit begaul dengan budak lain. Dan kalu ado budak betino yang agak belagak dikit pacaklah nyingok-nyingok untuk TP (tebar pesona) ...dulu rasonyo phrase TP belum ado ye...

Masuk ke jero kelas lagi, belajar lagi, belajar lagi, tapi mengkali yang pacak menjadi salah sikok pelajaran favorit di A1 dulu bukan pelajaran Fisika, bukan jugo Matematika or Kimia apolagi Biologi ..jauhlah kalu pelajaran itu. Pelajaran favorit kalu di SMA dulu so pasti Olahraga....ha..ha... Kalu sudah jam olahraga langsung kabur ke lapangan bawah, dan awalnyo biaso .. ado olahraga wajib dulu pecak lari keliling lapangan atau materi olahraga yang nak disampaike oleh guru olahraga. Sesudah itu, olahraga bebas dan tentu bae langsung ngembek bola kaki tuk main bola..., tendang sano tendang sini sampe baju olahraga kotor galo....masih dak yo lapangan yang agak luas di bawah dulu?

Untuk alumni SMA 10 A1 1990-91/92 pecak Endi Abdel Roza (di Palembang), Harry Mahyi (mungkin di Jakarta), Adhi Saputra (Jakarta), Syarif (di Dubai), Fathir (di Kalimantan), Sumi (di Semarang), Anton (di Palembang), Mexrol (di Palembang) dan banyak lagi budak-budak SMA 10 1990-1991/92 yang entah sudah kemano bae, salam dari Medan, dan cubolah sedenget menginget masa-masa SMA kito, lemak nian, dulu kito agak sedikit kuper tapi pasti sekarang waktu dan tempat sudah mengubah pribadi kito masing-masing.


Saifullani
A1 (Fisik1) SMA 10 Pelembang
1990-91/92


(Kontribusi dari Saifullani, alumni 3A1 angkatan 1989, saat ini bermukim di Medan, Indonesia)

SMANPUL, SEKOLAH KAMI

SMANPUL tu anggon sebab tempatnyo di pucuk bukit yang namonyo Bukit Besak. Parak pulo dengan tempat wisata Bukit Siguntang. Letaknyo tu strategis jugo untuk urusan angkutan umum. Mobil bukit (wong Pelembang nyebutnyo ‘taxi’) mangkal terakhernyo tepat di jabo sekolah tula. Jadi lemak nian buat budak-budak yang ke sekolah naek angkutan, berentinyo di jabo sekolah persis. Aku jugo dak nyangko kalu dulu besekolah di situ, sebab aku pengen nian masuk SMA laen, tapi dak pacak sebab masuk SMA tu mesti sesuai dengan rayon SMPnyo.

SMANPUL Palembang tu hebat, sebab banyak alumninyo jadi wong hebat. Jadi dak kalah jugo dengan SMA yang laen, yo dak ? Bangga jugo akhernyo aku jadi alumninyo. Sikok contohnyo, Ado sikok budak dari SMA tuh, padek nian dio tu. Banyak ilmunyo, bukan ilmu item atawa ilmu santet tapi ilmu belang beleng, campur aduk pecak pecel, apo bae dio pacak. Caro wong pinter lah, yo dak ? Tapi bukan pinter mudike ye …

SMANPUL jugo unik, sebab banyak guru dan muridnyo yang nyentrik. Baek dari gaya rambut, caro bebaju, caro bekelakar, caro gurunyo ngajar, samo tingkahnyo, atau istilah-istilah yang diarani budak untuk gurunyo. Pokoknyo nyentrik dak katek duonyo. Contohnyo ado guru yang gawenyo kelakar dak keruan padahal dio kalu ngajar dak tinggal kopcah nyungkuk di pucuk palaknyo, atau yang galak ngenjuk kemplang di pipi rai budak (ini bukan kemplang pajoan oii ..), yang galak nyuruh budak begawe rodi alias buat tugas sebakul. Ado jugo yang gawenyo ngawak buku terus, buku tu untuk nutupi muncungnyo bukan untuk ngajar. Ado jugo yang nawarke hargo damai (pake fulus), dak usah ngaweke tugas, ya cacam … dari kecik sudah diajari nyogok. Ado lagi yang hobinyo ngenjuk soal DERET.........(sampe bederet-deret budak tuh di depan papan tulis ngaweke soal deret).

Nah mak itu jugo dengan muridnyo, "Setali tigo uang" (baso Pelembangnyo apo ye?, “sikok tali tigo duit ?” ). Ado yang galak bolos, ado yang rajinnyo minta ampun (dak pacak idak pengen jadi juaro kelas), ado jugo yang seksi kular-keler (dak tahu nyari apo, cak gosokan baju bae bolak-balek), pacak bae dio tu kebelet, atau apo .... duet jajannyo nyampak di lapangan jadi becarian. Ado jugo yang pendiem pecak wong bisu, ngedem bae.......jangan-jangan memang bisu (atau ompong...ha...ha...ha...). Ado jugo murid yang baek nian, rajin dak banyak tingkah, kelakuannyo manis cak gulo (untung dak dikeroboti semut). Tapi yang mak ini jarang, langka nian, payah nyarinyo, sebab pacak di itung dengan jari, dari jempol cuma sampe jari jentik. Kalu nak contohnyo jelas be cak aku ni......hua....ha...ha....( ... :-) muji diri dewek), payo bekaco dulu oi (mati kebelagakan kagek), pecak yang paling eder di sekolah. Buka matotu lebar-lebar, kuping dikorek dikit pake korek kopeng, terus ngadep depan, mulut dikatupke........denger ini "Siapo nian ….Bicek tu?".
O......O.......aku adalah aku, cak kato penyair tesohor tu, kalu dak seneng.......ke laut bae ye (sambil belagak cak buntang pilem).

SMANPUL jugo ngetop, soalnyo masih temasuk TOP TEN walau paling buncit. Buncit dari itungan sikok, duo, tigo, empat, limo, enem, tojo, lapan, sembilan......., sepoloh ( baru belajar ngitung ), yang jelas bukan dari kualitasnyo, cuma dari urutan angko 1 sampe 10 bae. Ngetop sebab aku jugo salah sikok budak yang pernah sekolah di situ, kan akunyo TOP......wakakaka...ka :-) (pecak kebagusan).

SMANPUL, kareno sekolah di situlah aku jadi cak ini, pacak ngarang cerito ini, pacak kelakar dak keruan cak ini. SMANPUL-SMANPUL, walau cak mano jugo aku pernah jadi bagiannyo, sejarah dak mungkin diapus....apolagi di tip-ex. Dak jamannyo lagi pake pengapus dan tip-ex, bukan jaman kudo nyokot besi tapi besi yang nyokot kudo. Mak ini ari jaman sudah modern, cak uji wong tuh di ‘delete bae’ jadi kalu abes baco kelakar ini ado yang dak bekenan tolong bae di delete dari ingetan. Tapi jangan sampe lupo ingetan ye.....pacak penuh KM 5. Buah jeruk buah delima, tulisan buruk jangan dihina.......cie.


--------


Erlangen, 11 Sept 2008


(Kontribusi dari Vera Agustina, alumni 3A2-2 angkatan 1987, saat ini bermukim di Erlangen, Republik Federal Jerman)

S M A N P U L

setiap kali aku lewati.....
bentukmu masih seperti dahulu
setiap kali aku pandangi
gedungmu masih tetap berdiri teguh

setiap kali aku lewati
masih kutemui kelas-kelasku
tapi aku tak lagi bercokol disitu

setiap kali aku lewati
kulewati juga hari-hariku bersamamu
sekolahku...........
ya gedung sekolahku

-----

Erlangen, 22 Juli 2008


(Kontribusi dari Vera Agustina, alumni 3A2-2 angkatan 1987, saat ini bermukim di Erlangen, Republik Federal Jerman)

Alfa - Uno

Ini dio sikok cerito jaman bingen ...

Taon 1988, ado sekelompok budak-budak di SMANPul Palembang yang dimasoke ke kelas yang disebut A1, tepatnyo 2A-1. Taon itu kelas A1 nyo cuman sikok bae. Duo ikok A2 dan tigo ikok kelas A3. Kato uwong kelas A1 ini isinyo budak-budak pinter dan pilihan. Makonyo, ujinyo budak-budak A1 tuh agak betako'an. Padahal itu dak bener, dak katek-katek, kareno ado jugo yang buyan dan lolo di situ. Yo .. cak kamek nih lah. Budak A2 dan A3 tuh banyak yang padek. Kalu dio galak pacak jugo dio masuk A1, tapi budak nih memang dak galak masuk A1, banyak yang sengajo milih A2 atau A3. Contohnyo bae ye pecak Vera, Listina, Gemala (bukan Gembala ye ..), Faisal, Yusparman, Ira Padmira, Yuli Isnaini, Beny, Edwin, etc. Banyaklah.

2A1 nih cuman sikok kelas. Mulo-mulo kelasnyo di bawah, parak tanggo, yang kageknyo ditempati oleh 2A2-1. Dem tuh, dipindahke ke loker yang ngadep kantor Kepsek. Caknyo supayo dak pacak ribut. Kelasnyo diselangi sikok kelas dari WC, tempat koyo.

Nah, A1 nih dari kelas 2 sampe kelas 3, budaknyo itu-itu bae. Kecuali si Emilia dan Nurul yang baru masok di kelas tigo. Tapi jugo keilangan Darwison dan Burlian di kelas tigo itu. Waktu kelas tigo, dari 40 budak, cuman 11 uwong yang budak betino. Mereka tuh Anik, Poppy, Elya, Truusye, Elwyn, Eva, Evi, Nurul, Bintang (ehh Kartika), Yuniar, dan Emil. Sisonyo 29 budak lanang galo. Tapi hebatnyo budak tuh dak pernah bebala, apolagi begoco. Kompak galo.

A1 tuh banyak pentolannyo, pecak Wak Beben (pentolan kelakar), Syafrianur (sikok-sikoknyo Wak Aji), Budi (pragawan), Asril (pemain film Donald), Anom (kolektor), Adi (pentolan sepak bola, walaupun bukan top scorer, kareno top scorer nyo Izman dan Ear Sun – duo layangan wayang kulit), Wak Midi (kalu pelajaran Kimia, dio pindah duduk dari buri ke depan), Lightman (bek tangguh), Abriza (rajo minyak, tapi minyak oles bae), Nando (jagoan event organizer), Zul Kakek (pemikir), Burlian (gelandang serang), Anik yang punyo empat mato (.... sorry, Nik), dan laennyo.

Nah, waktu itu kepalak kelasnyo Wak Midi, yang galak dipanggil Bung Amat. Kelas duo wali kelasnyo Bu Syamsiah. Kelas tigonyo Pak Jamod (Najamuddin). Paleng seru kalu dak katek guru. Oiiii alangke ladasnyo. Ngobrol, nyungkuk-nyungkuk di jabo kelas tuh, dan ..... maen gitar. Pernah waktu kelas duo Pak Hsn Ahd (Wakepsek) ngendep-ngendep, nak digarinyo kelas tuh kareno budak-budaknyo nyanyi maen gitar. Eeiiiitt .. usahanyo Pak Hasan sudah tecium, kareno ado yang nyingok Pak Hasan ngendep-ngendep. Besengkut budak-budak diem galo, dak berenggut lagi dari bangku, ngedem galo. Dio caknyo jadi kecik ati. Masuk kelas, dibabitkenyo absen ke pucuk, belamburan galo. Mulutnyo maki-maki, nyumpah-nyumpah, dan mencarot-carot, sampe ngomong kotor. Oiiii ..dah .... budak-budak tuh A1 musik. Jadi beduso. Maafke kami Pak Hsn ye ...

Men ketaonan ribut, pacak budak tuh disungkemkennyo.

Tapi kalu yang masuk Pak Iskdr yang mudo tapi tuo itu, teduduk galo budak-budak dienjoknyo soal matematika. Mamang sikok ini galak nian masukin kelas kosong. Kalu budak lamo nyelesaikennyo, dio nyengir seneng sambil ngejekin. Caknyo suko atinyo nyingok budak-budak tuh saro. Pernah dio buat gambar pompa dan ditanyonyo dimano letak klep pompanyo. Oiii ... dah.

Sikok lagi yang buat sakit perut nih, Pak Cpr Sng, guru matematika. Rasonyo nak diceturke tulah rai nyo. Payo .. dak mada'i nian, seluruh soal di buku matematika, disuruhnyo digaweke galo. Oiiii saronyo ... tolong ...

Lemaknyo kalu sudah ari Sabtu. Budak-budak yang kebanyakan dak punyo cewek, janjian jalan-jalan, ato nyungkuk di jalan Kapten Rifai, atau maen nginep di rumah Izman. Padahal pengen rasonyo punyo cewek dan pacak ngapel. Lah, kalu ceweknyo dak galak, mak mano ?

Kalu sudem olahraga, ini yang paling sedep. Ladas ..... Gurunyo bae dak pacak ngendalike budak tuh. Pernah guru nyo ngancem ngoyake absen. Kato budak tuh, koyake lah. Nah, dilanjakennyo, dikoyakenyo nian. Tapi diembeknyo lagi, kareno budak-budak tuh ecak-ecak dak nyingok. Budak nih nak maen bola tulah.

Kalu maen bola kaki, kelas dibagi duo tim. Duo baris sebelah kiri kelas melawan duo baris sebelah kanan kelas. Biasonyo yang menang tim sebelah kiri he he . Di tim kiri ado Anom, Lightman, Fikri, Kakek, Sabili, Izman, Earsun, Iwan, Nyak Din, Jun, Reno, Wak Midi, Ermin. Di kanan ado Beben, Nando, Abriza, Adi, Asril, Desfansyah, Parto (Kalu yang ini bukan wong Jawo), Nando. Di sinilah Lightman pacak nakluke Adi.

Mak mano pacak apo kagek reuni tapi sambil maen bola lagi ?


(Kontribusi dari M. Irsan, alumni 3A1 angkatan 1987, saat ini bermukim di Medan, Indonesia)